بياع الوطنية
قررت تتجرأ و تروح ع سوق كانت مفتكرتو ثمين و كانت مآمنة أنو إي في هيك سوق … راحت ع ” سوق الوعد ” …
هلأ دخلت و بديت قصتها بهالجولة :
مرقت أول شي عند بائع سياسي ..
قالتلو : ” ممكن لو سمحت تقلي شو القرارات الجديدة و يا ريت تقلي كمان شو سعر الشكوى على الفساد و سعر الرأي عندك ؟ “
البائع : ” أهلاً و سهلاً تفضلي نحنا بخدمتك ، نحنا مع الوطن نحنا وطنيين ، طبعاً ممكن .. عمهلك بس إجاني تلفون من ابني ضروري رد ”
* عالتلفون ع جنب بصوت خافت : ” اي بابا أنا مو مضطر كل مرة إدفعلك عجامعتك الخاصة أنت و أخوك يعني رسوب رسوب اي كتير هيك بكرى بيشتلقوا علينا ناقصني كمان أخوك اللي سفّرتو لبرا منشان الخدمة الإلزامية دبر حالك هلأ في شوية مراقبة …. “
” عفواً لا تواخذيني كنتي عم تسأليني عن القرارات و الفساد و الرأي .. اي طبعاً منوعدك نشتغل عهالموضوع و منوعدك إنتي و الوطنيين الغيورين متلك عبلدنا أنو رح نسمعك و نحارب الفساد يعني شو بدنا نحكي ايييه منيح هالبلد لساتو واقف و صامد .. اعطيني الشكوى و أنا أكيد رح اشتغل عهالموضوع هيدا واجبنا .. و منشان رأيك معليش عنا شوية زحمة هالفترة ياريت تجمعيهن و تكتبيهن ع ورقة تحت مسمى ( رأي) عالظرف .. أهلا فيكي “
هيي نطرت و صاروا شعراتها طوال و ما اشتغل حدا عالموضوع و لا حدا عبّر .. قررت ترجع لعندو ولما شافتو قلها ” أهلا و سهلا فيكي نحنا بخدمة … إلخ .. كيف ممكن ساعدك ؟ “
هون هيي لفتها ظروف تحت مسمى ( رأي ) و ظروف تحت مسمى ( شكاوى فساد ) كانوا بقمامة السوق …
ضحكت و كتير و قالتلو : ” أهلا و سهلا فيي عند بائع الوطنية ,, كتير كبيرة عليي أنو مرقت لعندك .. و يا ويلي شو مستحية من أعمالك الخدمية .. غمرتني بلطفك و شرفك الكبير يا بياع الوطنية .. ابقى افتكر أنو الوطن كبير و بعرف في من أمثالك كتير بس إيييه في أمل ينقرض واحد متلك .. سلملي عالولاد و بتمنى يرسبوا عطول او قلك لأ أوعى تخليهن يرسبوا بخاف تفضى الخزينة . “