بركة المي المعكرة

0 1٬284
كانت راجعة على بيتها والدني شتي كتير و برد مو طبيعي ..
 هيي و عم تمشي بسرعة حتى ما تغرق أكتر بتصادفها بركة مي كبيرة كتير و صافية حتى الهوا ما كان يقدر عليها ..
 
 بتوقف عند البركة بتلمح صورتو بتفرك عيونها و بتضل عم تتطلع أنو سراب اللي
 عم تشوفو أو بركة مي عادية ؟؟!! .. صرلها فترة عم تحاول تنساه بس بركة 
المي ذكّرتها فيه ...
 
 بترجع على بيتها و الصورة لساتا ببالها ...
 
 بيجي اليوم اللي بعدو و بتمر من نفس الطريق حتى تتأكد بلكي الصورة لساتها 
موجودة .. بتشوف البركة بتقرّب عليها و بتشوفو عم يضحك ! عم يضحكلها ! 
بتخاف و بتستغرب و بتكمّل طريقها و هيي مفكّرة أنو كلّو وهم من كتر التفكير
 بموضوع شاغلها !
 
 وصارت كل يوم تمر من نفس الطريق و تقرّب من نفس البركة و تشوف نفس الصورة ..
 
 حتى قررت يوماً ما أنو تتجرأ و تخربش عليها ... قرّبت عالبركة و حاولت 
تكسر الصورة و قرّرت  تمحيها لو حتى بدها تنشّف البركة
 و بمجرد ما رسمت دائرة بإصبعها بهالبركة حتى اختفت الصورة و ماعد في حدا غير بقايا مي معكّرة و موحلة كتيير ..
 
 ضحكت و كمّلت طريقها  ..!!
 
 لما نقرر ننسى حكاية مزعجة مضت ... منقدر ..و منضحك أنو بقاياها كانت معكرة متل الحكاية .. منمشي و منكفي الطريق...
اترك رد

لن يتم نشر عنوان بريدك الإلكتروني.