بابتسامة ع وجها كل يوم الصبح تفيق و تقوم ترتّب تختها و تفتح البرداية الشفافة اللي بلون الصبح و تتطقس من الشباك حالة الجو لليوم ..
تركض و تتطلع تلاقي الساعة 7 ولازم أبوها يفيق عدوامو الساعة 8. بتعجق تختو و بتصير تدغدغ دقنو العشوائية و تضمو و دايماً تقلو: ” بابا بحب كتير ريحة معجون الحلاقة اللي بتحلق فيه دقنك ” و تضمو أكتر حتى يفيق مبسوط من حنانها ..
كانت تغلي القهوة ل 3 فناجين طبعاً هيي و عم تسمع فيروز على مسجّلتها الصغيرة ..
وهيي اللي تشرب الفنجان التالت!!!
كانت تستلذ بطعم الفنجان التالت و ترتشفو بهدوء و مع كل رشفة كانت تتذكر صاحبة الفنجان التالت ..
تتذكر والدتها كيف بهالوقت تكون معجوقة و عم تحضّر من الصبح الغدا و تفيقها هيي و أبوها و تقلها : ” القهوة جاهزة اشربيها قبل ما تروحي بلكي بتصحصحي شوي بنهارك “،” يللا ماما تعوا ، الفطور صار عالطاولة “
و تتذكر كيف كانت تقلّب إمها بين محطات الراديو على غنية لفيروز حتى تحس بحلاوة نهارها .
كان هالفنجان حكاية لأنو امها كانت تمسكو بكل أصابعها و كأنها خايفة عليه ينكسر كانت تمسكو كأنها عم تضمو و تبصم ريحة إيديها عليه .. كأنها كانت بتعرف أنو رح تتركو ..
و تركتو .. نزلت دمعتها مع آخر رشفة للفنجان و تذكرت إمها كيف تركتو ..
كان آخر شي بتلمسو ( فنجان القهوة تبعها ) قبل ما تستشهد بتفجير وهيي رايحة تشتري هيل لصبح جديد .
و هلأ أبوها فاق … مسحت دمعتها و خبّت فنجان القهوة التالت و ضمتو لأبوها أكتر و أكتر مع بوسة على خدو فرحانة فيه و تقلو ” حبيبي يا حبيبي مالي غيرك حدا
